• NAXÇIVAN MUXTAR RESPUBLİKASININ DÖVLƏT GÖMRÜK KOMİTƏSİ
  • Gömrük xidməti hər bir dövlətin müstəqilliyinin əsas atributlarından biridir

    Naxçıvan gömrükçüləri çempion olub

    10 May 2019

    Azərbaycan Respublikası gömrük orqanları arasında keçirilən futzal çempionatına yekun vurulub. Ümummilli lider Heydər Əliyevin anadan olmasının 96-cı, Azərbaycan Respublikası Dövlət Gömrük Komitəsinin yaradılmasının 27-ci ildönümünə həsr olunan yarışda 12 komanda mübarizə aparıb.

    May ayının 9-da Bakı şəhərində keçirilən final qarşılaşmasında Naxçıvan Muxtar Respublikası Dövlət Gömrük Komitəsinin komandası ilə Azərbaycan Respublikası Dövlət Gömrük Komitəsinin komandası üz-üzə gəlib. İlk dəqiqələrdən təşəbbüsü ələ alan futzalçılarımız İlqar İsmayılovun baxımlı qolu ilə hesabı açıblar. İki dəqiqə sonra Polad Həsənli fərqi iki topa çatdırıb. Fasilədən sonra da matçın ssenarisi dəyişməyib və komandamız həlledici qarşılaşmada 6:1 hesablı qələbə qazanıb. Bu nəticə ilə Naxçıvan Muxtar Respublikası Dövlət Gömrük Komitəsinin futzal komandası ard-arda altıncı çempionluğunu bayram edib.

    Final oyunundan əvvəl keçirilmiş üçüncülük uğrunda qarşılaşmada isə Bakı Baş Gömrük İdarəsinin komandası Hava Nəqliyyatında Baş Gömrük İdarəsinin futzalçılarından üstün olub.

    Sonra ilk üç yeri tutan komandaların və fərqlənənlərin mükafatlandırılması mərasimi olub. "Naxçıvan" komandası mötəbər kubokla yanaşı, diplom,medal və qiymətli hədiyyələrlə mükafatlandırılıb. Komandamızın üzvlərindən Rahil Tahirli çempionatın “Ən yaxşı qapıçı”sı, final qarşılaşmasında hettrik edərək çempionat ərzində vurduğu qolların sayını 16-ya çatdıran Orxan Məmmədov isə “Ən məhsuldar oyunçu” seçilib.

    Komitənin Mətbuat xidməti





    © 2019 dgk.nmr.az | Naxçıvan Muxtar Respublikasının Dövlət Gömrük Komitəsi