Hüquq mühafizə fəaliyyəti :: Naxçivan Muxtar Respublikası Dövlət Gömrük Komitəsi
AZ
EN
RU

Virtual qəbul

Naxçıvan MR Dövlət Gömrük Komitəsinin sədri ilə birbaşa əlaqə.

Virtual qəbula keç

Valyuta məzənnəsi

26.04.2019

USD - 1.7000

EUR - 1.9423

GBP - 2.2312

IRR - 0.0040

RUR - 0.0257

TRY - 0.3158

Hüquq mühafizə fəaliyyəti

  2018-ci ildə görülmüş işlər  

Gömrük orqanları tərəfindən narkotik vasitələrin qanunsuz dövriyyəsinə və gömrük sahəsində digər hüquqpozma hallarına qarşı mübarizə tədbirləri 2018-ci ildə də qətiyyətlə davam etdirilmişdir. Naxçıvan Muxtar Respublikasının Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyasının Tədbirlər Planına əsasən gömrük orqanlarının üzərinə qoyulmuş vəzifələrin icrasını təmin etmək, narkotiklərin qanunsuz dövriyyəsinə qarşı mübarizə istiqamətində görülən işləri təkmilləşdirmək məqsədilə digər dövlət orqanları ilə birgə fəaliyyət planı müəyyənləşdirilmişdir. Hüquq-mühafizə orqanlarından alınan məlumatlar vaxtlı-vaxtında araşdırılmış və müvafiq tədbirlər görülmüşdür.

Gömrük orqanları tərəfindən qaçaqmalçılıq hallarının qarşısını almaq məqsədilə beynəlxalq təcrübəyə istinad edilmiş, əməliyyat-axtarış fəaliyyəti və risklərlə bağlı əldə olunmuş məlumatlar, o cümlədən mövcud əməliyyat şəraitinin təhlili nəzərə alınaraq müvafiq tədbirlər həyata keçirilmişdir. Gömrük nəzarətinin müxtəlif formalarının tətbiqi, müasir texniki nəzarət vasitələrindən istifadə və kinoloji xidmətin səmərəli təşkili uğurlu nəticələr vermişdir. 

İl ərzində narkotik qaçaqmalçılığı üzrə 12 cinayət xarakterli fakt qeydə alınmış, ümumilikdə 208,1 kq heroin, 238,4 qram metanfetamin, 4,2 qram tiryək,  2,6 qram marixuana, 1,4 qram metadon, 0,5 qram tramadol,  0,04 qram klonazepam aşkarlanmışdır. Narkotik qaçaqmalçılığı üzrə cinayət tərkibli əməllərin sayı 2017-ci illə müqayisədə 9 fakt artmışdır. 3 fakt qabaqlayıcı əməliyyat məlumatı əsasında, 9 fakt isə gömrük nəzarəti zamanı aşkara çıxarılmışdır. Cinayət tərkibli faktların 2-də narkotik vasitələrin muxtar respublikanın ərazisindən tranzit keçməklə Türkiyə Respublikasına aparılması, 2-də İran İslam Respublikasından narkotik vasitələrin muxtar respublikaya gətirilməsi, 8 halda isə İran İslam Respublikasından muxtar respublika ərazisi vasitəsilə Bakı şəhərinə aparılma halı müəyyən olunmuşdur.

Narkotik vasitələrin qanunsuz dövriyyəsi üzrə cinayət əməli törədənlərin 2-si Türkiyə Respublikası, 11-i isə Azərbaycan Respublikası vətəndaşı olmuşdur. Həmin faktlarla bağlı Azərbaycan Respublikası Cinayət Məcəlləsinin 206-cı maddəsi ilə iş açılmışdır. Şahtaxtı və Culfa gömrük sərhəd buraxılış məntəqələrində quraşdırılmış X-ray tipli rentgen nəzarət qurğularının köməkliyi ilə muxtar respublikadan tranzit hərəkət edən Türkiyə Respublikasına məxsus nəqliyyat vasitələrindən 207.6 kq narkotikin aşkarlanması faktı gömrük orqanlarının texniki nəzarət vasitələrindən səmərəli istifadəsinin uğurlu göstəricisidir.

Ötən illə müqayisədə cinayət xarakterli faktların sayı 9 ədəd, cinayət məsuliyyətinə cəlb olunanların sayı isə 10 nəfər artmışdır. Əvvəlki illərdən fərqli olaraq narkotik vasitələri və psixotrop maddələri daxili orqanda gizlədərək gömrük nəzarətindən yayındırmaq cəhdləri daha geniş xarakter almışdır. Əgər 2017-ci ildə narkotik vasitəni bədən daxilində gizlədib keçirmə ilə əlaqədar 1 fakt olmuşdusa, hesabat ilində eyni üsulla gizlətmə ilə bağlı 8 fakt qeydə alınmışdır. 

2018-ci ildə hüquqpozma faktlarının qarşısının alınması istiqamətində muxtar respublika gömrük xidmətinin digər hüquq-mühafizə orqanları ilə qarşılıqlı fəaliyyəti də uğurlu nəticələr vermişdir. Belə ki, birgə həyata keçirilmiş 3 əməliyyat-axtarış tədbiri nəticəsində 38.4 qram həşiş qətranı, 17.9 qram tiryək, 9.5 qram marixuana, 100 ədəd psixotrop tərkibli dərman vasitələrinin gətirilməsinin qarşısı alınmışdır.

İl ərzində psixotrop maddələrin qanunsuz dövriyyəsinə qarşı mübarizə xüsusilə diqqətdə saxlanılmışdır. Mülki dövriyyəsi məhdud olan dərmanların elektron bazası formalaşdırılaraq gömrük orqanları tərəfindən psixotrop tərkibli dərmanların dövriyyəsinə tam nəzarət olunması təmin edilmişdir. Eyni zamanda, narkotik vasitələr, psixotrop maddələr və onların prekursorlarının gömrük sərhədindən keçirilməsinin qarşısının alınması məqsədi ilə profilaktik tədbir kimi bu halların cinayət məsuliyyəti yaratması barədə kütləvi informasiya vasitələrindən və sərhəd gömrük buraxılış məntəqələrindəki elektron məlumat lövhələrindən istifadə etməklə vətəndaşların maarifləndirilməsi işi aparılmışdır. 

2018-ci il ərzində gömrük orqanları tərəfindən muxtar respublika ərazisinə gətirilməsinə dair müvafiq icazə sənədi olmadığından vətəndaşlardan 74 min 591 ədəd müxtəlif adda dərman vasitələri saxlanılmışdır ki, bunların da 62 min 251 ədədi psixotrop tərkibli olmuşdur. Qeyd etmək yerinə düşər ki, saxlanılan psixotrop tərkibli dərman preparatlarının sayı 2017-ci illə müqayisədə 11 min 704 ədəd çox olmuşdur.

Naxçıvan Muxtar Respublikası Dövlət Gömrük Komitəsi və tabeli gömrük orqanları tərəfindən 2018-ci il ərzində 125 hüquqpozma faktı qeydiyyata alınmışdır. Hüquqpozma faktlarından 113-ü inzibati xarakterli olmuşdur. İnzibati məsuliyyətə cəlb edilənlərdən 29920 manat cərimə alınıb müvafiq hesaba köçürülmüşdür. Aşkar edilmiş inzibati xətalara dair işlərin nəticələri təhlil edilmiş və qəbul olunmuş qərarların icra vəziyyəti yoxlanılmışdır.

2018-ci ildə gömrük sərhədindən müvəqqəti keçirilən mal və nəqliyyat vasitələrinin müəyyən edilmiş müddət ərzində geri qaytarılmasına gömrük orqanları tərəfindən nəzarətin həyata keçirilməsini təmin etmək məqsədi ilə VAİS proqram təminatının “Sərhədkeçmə zamanı xüsusi diqqət siyahısı” bölməsinin və gömrük sərhədindən keçirilən mallar və nəqliyyat vasitələri üzərində gömrük nəzarətinin təkmilləşdirilməsi üçün “Risklərin avtomatlaşdırılmış idarəedilməsi” sisteminin tətbiqinə başlanılmış, nəqliyyat vasitələri barədə Daxili İşlər Nazirliyi ilə elektron məlumat mübadiləsi təmin olunmuşdur. Gömrük sahəsində hüquqpozmalara qarşı mübarizə işində səmərəliliyi artırmaq məqsədilə Azərbaycan Respublikasının digər sərhəd keçid məntəqələrində aşkar olunan narkotik vasitələr, onların keçirilmə yolları barədə məlumatlar şəxsi heyətə çatdırılmış, X-ray tipli rentgen nəzarət qurğuları vasitəsilə müəyyən edilən gizli saxlanc yerlərinin görüntüləri təhlil olunmuşdur. Aşkar olunan maddələrin narkotik vasitə olmasını müəyyənləşdirmək üçün gömrük orqanları ekspres analizatorlarla təmin edilmişdir.

Hesabat dövrü ərzində dünyada cəryan edən radikal və ekstremist dini ideyaların təbliğinin qarşısını almaq məqsədilə qabaqlayıcı tədbirlər davam etdirilmiş, vətəndaşlar tərəfindən gətirilən 81 ədəd kitab, 8 ədəd sarğı, 3 ədəd zəncir, 4 ədəd tablo Dini Qurumlarla İş üzrə Dövlət Agentliyi tərəfindən idxalına rəsmi razılıq olmadığı üçün götürülmüşdür. Bundan əlavə, idaxalına xüsusi icazə və razılıq tələb olunan 52 flakon kalium-permanqanat, 125 min 235 ədəd pirotexniki vasitə, 203 min 200 ədəd siqaret, 37 ədəd beşbarmaq, 2 ədəd qandal, 30 ədəd ov silahı mərmisi, 2550 ədəd tir gülləsinin mərmisi, 6 ədəd gözyaşardıcı qaz, 8 ədəd rezin dəyənək, 1 ədəd xəncər, 1 ədəd qılınc, 1 ədəd pnevmatik tapança, 1 ədəd tir silahı, 1 ədəd qədim xalça, 9600 dollar saxta pul, mənfur Ermənistan Respublikasına aid 77 ədəd dəmir və kağız pullar, 12 ədəd sim nömrə, 3800 ədəd siqaret aşkarlanaraq saxlanılmışdır.

İl ərzində kinoloji xidmətin səviyyəsinin yüksəldilməsi və kinoloqların peşəkarlığının artırılması istiqamətində görülən işlər hüquqpozmalara qarşı mübarizənin səmərəliliyinə müsbət təsir göstərmişdir. Əsasən narkotik vasitə, siqaret, silah və valyuta axtarışı üzrə ixtisaslaşmış müxtəlif cinsli itlərin təlimi və baxımı həyata keçirilmiş, xidməti itlər sərhəd keçid məntəqələrimizdə qeydə alınan bir çox hüquqpozma faktlarının aşkarlanmasında yaxından iştirak etmişlər.

Muxtar respublika gömrük xidmətinin hüquqpozmalara qarşı mübarizə şöbə və bölmələri bundan sonra daha səmərəli nəticələr əldə etmək üçün bütün səy və bacarıqlarını mütəşəkkil qaydada səfərbər edəcək, öz fəaliyyətini muxtar respublikamızda əldə olunmuş sabitliyin, sağlam və firavan həyat şəraitinin qorunmasına, əməliyyat-axtarış işinin genişləndirilməsinə, gömrük sahəsində hüquqpozma hallarının qarşısının alınmasına yönəldəcəkdir.

Komitənin Əməliyyat və təhqiqat şöbəsinin məlumatı

Virtual qəbul

Naxçıvan MR Dövlət Gömrük Komitəsinin sədri ilə birbaşa əlaqə.

Virtual qəbula keç

Faydalı informasiya

Bütün məlumatlar

Keçidlər

Valyuta məzənnəsi

26.04.2019
AR Mərkəzi Bankının valyuta məzənnəsi arxivi ilə burada tanış ola bilərsiz.